საქართველოს მთავრობისა და MTV ხელმძღვანელობასთან მიღწეული შეთანხმების საფუძველზე, 2011 წლის ზაფხულში ბათუმში MTV-ის ყოველწლიური საერთაშორისო საკონცერტო სერია გაიმართება . ინფორმაციას საქართველოს კულტურისა და ძეგლთა დაცვის სამინისტრო ავრცელებს.
როგორც ოფიციალურ განცხადებაშია ნათქვამი, MTV-ს პირველი კონცერტი მსოფლიოს წამყვანი მუსიკოსების მონაწილეობით 2011 წლის ზაფხულის დასაწყისში შედგება. ღონისძიება გადაიცემა მსოფლიო მასშტაბით (აღმოსავლეთ და დასავლეთ ევროპა, ამერიკა, ცენტრალური აზია და ა.შ).
MTV-ის საქართველოს საკონცერტო სერიები იმავე ინტენსივობით გაშუქდება, როგორც EMA-ს, VMA-ს და აფრიკული მუსიკის დაჯილდოების ცერემონიები.
"ამ პროექტის მიზანია საქართველოს, როგორც ტურისტულად მიმზიდველი ქვეყნის, მსოფლიო ყურადღების ცენტრში მოქცევა. MTV-ის გამოცდილება, მიიზიდოს თავის კონცერტებზე ათობით ათასი მაყურებელი, საქართველოს ტურისტული ეკონომიკის განვითარებაში დაეხმარება", _ ნათქვამია განცხადებაში.
იქვე აღნიშნულია, რომ MTV- ის საკონცერტო სერიებზე უსაფრთხოების გარანტიისთვის თანხები ძირითადად საქართველოს კერძო სექტორიდან დაიხარჯება. გარდა ამისა, ორივე მხარე აგრძელებს სპონსორების ძიებას იმისათვის, რომ ღონისძიება საქართველოში მაქსიმალურად მაღალ დონეზე ჩატარდეს.
სამინისტროს ინფორმაციით, მონაწილეებისა და ვარსკვლავების სრული სია და MTV- ის საკონცერტო პროგრამასათან დაკავშირებით ყველა დეტალი დაზუსტდება მომავალ კვირას, MTV- ის ხელმძღვანელობის
საქართველოში ვიზიტის შემდეგ.
0 კომენტარი:
Отправить комментарий